Statkraft áigu buvttadit eanet elrávnnji Álttá fápmorusttegis

Go Álttá fápmorusttet huksejuvvui 1980-logus, de heivejedje goalmmát turbiinna bidjamii. Neahttakapasitehta ráddjehusaid geažil bidje dušše guokte turbiinna. Turbiidna lea oassi rusttegis mii ráhkada elrávnnji čázi energiijas. Go neahttakapasitehta maŋemus jagiid lea buorránan, lea dál vejolaš vuostáiváldit eanet elrávnnji. Danne ohcá ge Statkraft dál konsešuvnna lasihit elrávnnji buvttadeami Álttá fápmorusttegis birrasiid 20 proseanttain, dainna lágiin ahte ávkkástallat dulvečázis mii odne luitojuvvo meattá fápmorusttega.

– Lea dehálaš oažžut nu ollu ávkki go vejolaš dan čázis mii juo lea regulerejuvvon elfápmobuvttadeapmái. Jus dát prošeakta čađahuvvo, de sáhttit buvttadit eanet elfámu dulvečázi ávkkástallamis, ráddjejuvvon ođđa váikkuhusaiguin lundui ja birrasii. Álttájohka lea dehálaš, nationála luossajohka, mas lea stuora árvu sihke báikki olbmuide ja ealáhuseallimii. Álttájoga birasdilli lea buorre ja stivrennjuolggadusat galget viidáset fievrriduvvot dálá hámis. Mis lea čađa gaska leamaš gulahallan iežamet plánaid ektui beroštusservviin geat hálddašit bivddu Álttájogas (ALI), go midjiide lea dehálaš sihkkarastit ahte luosa dilálašvuohta jogas bissu unnimus seamma buorrin go odne lea. Dan oaivvildit mii plánat vuhtiiváldet mat dál leat sáddejuvvon NVE hálddahussii árvvoštallamii, dadjá Maren Sisilie Joné, Statkraft regiovnnadirektevra.

Álttá fápmorusttega huksemis 1980-logus, lea erenoamáš sadji norgga čáhcefápmorusttega historjjás, ja dat lea nannosit čadnon sihke luonddugáhttema ja sámi vuoigatvuođaid áŋgiruššamii. Jus Statkraft oažžu lobi sajáiduhttit goalmmát aggregáhta, de mearkkaša maid ahte lassánit doaimmat boazodoalloguovllus huksehusáigodagas.

– Álttá fápmorusttet lea guovddášguovllus sámi ealáhus- ja kulturdoaimmaheamis. Fápmorusttegis leat nana historjjálaš referánssat ja mii leat diehtomielalaččat dan ektui go dál oaidnit vejolašvuođa fápmorusttega ođasmahttit. Danne lea dehálaš ahte boazodoallu lea mielde váikkuheame proseassa konsešuvdnaohcamuša hábmemis. Maŋemus jagi leat guoskevaš siiddat ovttas minguin bargan, gávdnan dihte čovdosiid gos guktot bealit dahket heivehemiid ja doaibmabijuid vai proseassa sáhttá čađahuvvot. Mii leat ilus ahte šiehtadusat leat sajis guovtti siiddain geaidda prošeakta váikkuha eanemusat, namalassii 23A Válgennjárgga ja 23C Jalgon siiddain, ovdalgo ohcan lea sáddejuvvon. Šiehtadusain boahtá ovdan ahte siiddat leat miehtan prošeavtta čađaheami jus Statkraft oažžu konsešuvnna, dadjá Maren Sisilie Joné. Eará siiddaiguin ja orohagaiguin leat ain gulahallamat jođus.

Konsešuvdnaohcamuš sáddejuvvo dál NVEii. Sin bokte čađahuvvo viiddis gulaskuddanproseassa oassin áššemeannudeamis. Jus NVE addá konsešuvnna, galgá Statkraft mearridit čađahuvvo go prošeakta, ja prošeakta sáhttá áramusat leat gárvvis jagi 2030.

– Finnmárkkus lea dárbu heivehit eanet ealáhusovdánahttimii. Elrávnnji fidnet lea dehálaš oassi ođđa bargosajiid ovdánahttimis. Statkraft lea dehálaš aktevra Davvi-Norggas ja Álttá fápmorusttega ođasmahttimiin mii nannudit dien posišuvnna vel eanet, dadjá regiovnnadirektevra Maren Sisilie Joné.

Ođđajagimánu 2024 almmuhedje Statkraft ođasmahttin ja viiddidanplána norgga čáhcefápmorusttegii, mas leat unnimus vihtta stuora ođasmahttima. Oktiibuot pláne fitnodat investeret gitta 55 miljárdda rádjái norgga čáhcefápmorusttega ođasmahttimiidda ja viiddidemiide. Álttá fápmorusttet lea oassin dán plánas.

– Statkraft lea hálddašan čáhcefámu 130 jagi. Dál mii leat dakkár áigodagas go máŋga fápmorusttega galget ođastuvvot vai sáhttet buvttadit elrávnnji elfápmovuogádagas mii lea rievdamiid vuolde. Mii leat ovdalaččas ovdanbuktán prošeavttaid Maurangeris Vestlánddas, Nores Østlánddas ja Auras Gaska-Norggas, gos maiddái ođđa Svean fápmorusttet huksejuvvo. Dál sáddejuvvo konsešuvdnaohcamuš beassat ođasmahttit Álttá fápmorusttega. Mii leat fápmorusttet olles riikka várás, ja bargat ovttasráđiid suohkaniiguin, ealáhuseallimiin ja báikkálaš beroštumiiguin doppe gos leat, dadjá Pål Otto Eide, Statkraft ovdánahttindirektevra Davviriikkaid ovddas.